قصيدة بعنوان واهي ماشية
عشان نقدر نعيش لازم
تعيش جوانا أحلامنا
ولاجل الشمعة ما تنور
طريق الحب قدامنا
لازم نضحك وجوانا الألم مكبوت
وصوت الحب يتوجع لحد الموت
يقوم الحلم ويعالج أمل مهدود
ونرجع للحياة تاني نعد فيها أيامنا
واهي ماشية ومش عارفين
لفين رايحين
لسكة آه مع التايهين
لدمعه حزينة جوانا
رافضة تبوح بأسرارنا
وساكنة جوا نن العين
وعايشة ويا قلب حزين
اديلها سنين
خلاص يا حزن ودعنا
انا دلوقتي مش شايف
وماشي في الحياة خايف
يا بكرة حن واسمعني
وخف يا عم أوجاعنا
فراغ الدنيا كان أهون
عليا من عذاب الليل
ابات مهموم أقوم باكي
نهار يجي بهم طويل
وماشي فيكي في الضلمة
وممنوع حتى أقول كلمة
ولو تنزل دموع عيني تكون نعمة
لكن ممنوع دموع تنزل تريحنا
واهي ماشية
ساعات أضحك ألاقي الضحكة كدابة
أشوف نفسي ألاقي الدمعة غلابة
كتير أسأل ومش لاقي ولا إجابة
اتاري الهم جوا الدم
بيجري ويا أفراحنا
ويتسابق لحد ما فاز
وكتر الهم خلاني بقلب قزاز
ومات الفرح وعاش الهم
يتمتع في ليل أسود مع جراحنا
يا عم الحلم فوق وأصحى
بقالي سنين على المرسى
ومستنيك في يوم ترضى
تفوق لحظة تريحنا
آنا الباكي آنا الشاكي
انا اللي دمعتي في عيني
انا اللي عشت وياكي
انا اللي قلت حبيني
يا ريت أقدر علي فراقك
يا ليل الحب فرحنا
واهي ماشية
وبكرة يحسوا بجراحنا
الشاعر ناصر عبد المقصود
ليست هناك تعليقات:
إرسال تعليق