كلام العيون
________________
بصيت فى عين الولد
ولمحت ألف سؤال
ليه المجاعة فى بلد
أكتر ما فيه المال
ليه الفساد بيطوف
ولا لحظة حس بخوف
والأمر بالمعروف
شايف التهم أشكال
بصيت فى عين الولد
ولمحت ألف سؤال
________________
بصيت فى عين البنت
ولمحت مليون آه
يا للى حكمت وخنت
فين الحنان نلقاه
قطر الجواز اهو طار
والناس عيونها شرار
والغدر والأشرار
شئ مستحيل ننساه
بصيت فى عين البنت
ولمحت مليون آه
_______________
بصيت فى عين الأم
والصبر ساب علامات
ولقيت قصايد هم
كان لينا حلم ومات
نلقى الأمان فى الوطن
من غير دموع أو شجن
باعوا الوطن والتمن
كرسى يدوم سنوات
بصيت فى عين الأم
والصبر ساب علامات
_______________
بصيت فى عين الأب
والعقل منه خلاص
قتلت بلادنا الحب
والعدل والإخلال
اوعى تقول القدر
قول الفساد انتشر
والشعب رغم الخطر
راكب فى نفس الباص
بصيت فى عين الأب
والعقل منه خلاص
______________
بصيت للون الشجر
أصفر بيشكى جفاف
مشتاق لحبة مطر
تتحسن الأوصاف
كان ليا ضل جميل
نسمة هوا بتميل
لو جانى قلب عليل
يلقى الدوا أصناف
بصيت للون الشجر
أصفر بيشكى جفاف
________________
شعر /محمد الشرقاوى
ليست هناك تعليقات:
إرسال تعليق