" الدور عليــــــــــــك " زجلية الشاعر أحمد هلال / مجلة همسات شعرية

الدور عليك

بعد اللي حاصل ف الوطن

من بكره توبك يتِبًدًل ..

يصبح كفن

وتعيش ما تلقى حضن دافي يسترك

معدش غير حضن التراب

مع انه مليان بالعفن

الدور عليك..

متقولش دا حكم وقدر

كان فين جنابك لما نادى عليك حجر

أمسك بأيدك جمر جاي من الغضب

انفض وثور..

شعللها نار هما الحطب

عز الطلب .. لو مره قهرك ينفجر

الدور عليك

تطحن بواقي العمر ف رحاية الزمن

وعصايتك العوجة معدتش بتخوف غنم

الدور عليك

لما تدور ف سواقي تطحن حضرتك

واللحم مرمي ع الطريق وقت المحن

يابو قلب مابيعرف حنان

يامفرق الدمع اللي كان

علشان نلاقي لقمه حاف

ولا عادش فرح يلمنا

يروي سنين كانت عجاف

وانا مش بخاف من ليل ظلام

شبعنا ياما م الكلام

تشجب وتنكر ايه يفيد

ف قرار وواخده عميل غبي

ان اسرائيل تأمر تسيد

على مسرى سَيِّدنا النبي

الدور عليك

تطلع عنيك .. ارضك تضيع

قدسك يضيع

شرفك يضيع

وفاضل ايه يا أمة عايشه عمرها

كل اللي باقي ف حلمها

ازاي تراضي عدوها

ف قضية ( التطبيع )

امتى نفوق ..

يا أمة ضيعها الهوان

يا أمه عايشه ع التاريخ

وبتبكي ع المجد اللي كان

ماعدش خالد اوعمر ..

ولا اتولد بيننا صلاح

ومادام عشقنا الإنبطاح ..

يبقى اكيييييد..

الدور عليك
...............

بقلم

 ( احمد هلال )